Ny søknad frå Fri Flyt om heli-skiing i Sunnmørsfjella – Naturvernforbundet er kritiske

Kvart år søker magasinet Fri Flyt om å få nytte helikopter til å lage reportasjar frå heli-skiing i Sunnmørsfjella. Dei siste åra har det gått søknad til alle kommunane på Indre Sunnmøre, og søknadene har alltid vore utforma for å gi mest mogleg «fri flyt» av helikopterløyve. Naturvernforbundet er kritiske til denne bruken av helikopter…

By Artikkelimportør

01.12.2008 09:55

I Fri Flyt sin søknad til Ørsta kommune, som Naturvernforbundet no har gitt fråsegn til, blir det søkt om å få nytte mange av dei flottaste naturområda i landet til heli-skiing, ein aktivitet som generelt er forbode i Noreg. Naturvernforbundet meiner slik støyande aktivitet bør nyttast i dei områda som allereie er mykje utsett for motorisert ferdsel, t.d. der det finst alpinanlegg.

– Det finst rikeleg med Hemsedalskvalitet med tilrettelegging og støyande verksemd kring om i landet. Slogenkvalitet er mykje meir sjeldan og heller unik i friluftslivssamanheng. Denne Slogenkvaliteten skal marknadsførast som det han er og slett ikkje øydeleggast av helikopterverksemd, skriv Naturvernforbundet mellom anna i fråsegna si til Ørsta kommune.

Konklusjonen frå Naturvernforbundet er elles tydeleg:

Naturvernforbundet ber om at søknaden blir avslått. Vi tillet oss å foreslå at søkjar i staden får lov å lande i same område som dei den 11.12.2007 fekk løyve til våren 2008, bortsett frå Sætretindan som ligg i viktig friluftsområde.

For friluftslivet sin del er fredagen å sjå på som helg for mange. Helikopterverksemda bør såleis avgrensast til perioden måndag-torsdag. Vidare kan det vere uklårt kva påskehøgtida i praksis er. Viss ein er samde om at fredag 3.4. til og med måndag 13.4. er påskehøgtid og helikopterfritt i alle fall, så er det grei avgrensing.

Blir det gitt løyve som gjeld søraustsida av Hjørundfjorden er klage frå Naturvernforbundet pårekneleg.

Øystein Folden er leiar i Naturvernforbundet i Møre og Romsdal. Han har telefon 91 81 25 42.